TIGALINGGA

Tigalingga inganku mbelin
Ingan erguro tengah kesain
Tah gia ndekah nggo kutadingken
Kuta si malem la terlupaken
Adi ku inget jaman si nai
Kalak ngeranto reh ndauh nari
Mbuah pagena adina rani
Merih manukna sangap encari
Kerangen mbelang deleng meratah
Nggurisa kabang ergawah-gawah
Pincala rende bas datas talah
Megi sorana ukur meriah
Adina musim wari perlego
Lau Belulus tetap erdeso
Karina pulung radu ertoto
Dahin ijuma ula min lolo
Nggo kenca reh wari perudan
Kalak perjuma mulai nuan
Adi nggo dung karina merdang
Ukur simberat jadi menahang
Ndalan dalani pasar si nggedang
Reh kenca udan erkubang-kubang
Sada pe motor la lit erdalan
Adi maba barang erkuda boban
Lawis ku tiga bas wari kamis
Ndayaken mbako penukur uis
Si erbinaga mbue nge rulih
Erdalan nahe pe la kapna latih
Adina berngi bulan na terang
Meriah kundul kalak erbual
Dingen na mbayu amak simbelang
Emkap amakna paya bengkuang
Tiap pukul enem erpagipagi
Ersora lonceng gereja nari
Tandana mbincar nggo matawari
Iyah kekeken, dahin nimai
Pancur merdeka inganta ridi
Namo Buara ingan erlangi
Kalak si ndurung la ngadingadi
Ngayakngayak ben nandangi berngi
Tigalingga jaman gundari
Nggo mbue sambar nggo mbue ganti
Sora mburagi lanai terbegi
Bage pe sora si leto pingki
Paya si mbelang pe nggo kerah
Kayu si nggedang nggo mbue itabah
Kerangen si nai lanai meratah
Nggurisa kabang lanai teridah
Lau si maler lanai bo mbagas
Lanai teridah nurung kaperas
Kalak perjuma pe nukur beras
Ngelar durinpe terpaksa lampas
Gia jaman nggo ganti ganti
Si enggo lewat la terulihi
Mbelang pe taneh nggo kudalani
Ate metedeh la ngadi ngadi

Karya : NONAME